اسلام آباد(روشن پاکستان نیوز) وزیراعظم کے معاون خصوصی برائے صنعت ہارون اختر خان نے کہ ہے کہ وفاقی حکومت خواتین کے مسائل حل کرنے اور سہولیات فراہم کرنے کیلئے پرعزم ہے، حکومت سمال انٹرپرائز کے ذریعے خواتین کو معاشی طور پر بااختیار بنانے کیلئے کام کر رہی ہے، پاکستان کی پچاس فیصد سے زائد آبادی خواتین پر مشتمل ہے،ہم صرف اپنی پچاس فیصد ورک فورس کے ذریعے کام کر رہے ہیں، دنیا بھر کی تمام بڑی ائیر لائنز میں خواتین کام کر رہی ہیں، خواتین متحرک کردار کے ذریعے معاشی ترقی کے سفر میں اپنا حصہ ڈالیں۔ وہ بدھ کو ایف پی سی سی آئی اور سمیڈا کے زیر اہتمام انٹرنیشنل ویمن انٹرپنیورشپ ڈے کی تقریب سے خطاب کر رہے تھے۔ تقریب میں صدر ایف پی سی سی آئی عاطف اکرام شیخ، سی ای او سمیڈا مس نادیہ ،نائب صدر ایف پی سی سی آئی قراة العین، طارق جدون، چئیرمین کیپٹل آفس کریم عزیز ملک، چئیرمین کوآرڈینیشن و صدر حافظ آباد چیمبر ملک سہیل حسین و دیگر بھی شریک تھے۔ تقریب سے خطاب کرتے ہوئے صدر ایف پی سی سی آئی عاطف اکرام شیخ نے کہا کہ خواتین صرف معاشی منظرنامے میں شریک نہیں بلکہ وہ انوویشن اور پائیدار ترقی کے پیچھے محرک قوت ہیں،ہارون اختر خان کا ویژن اور سپورٹ ایس ایم ایز اور بزنس سیکٹر میں خواتین کو بااختیار بننے کیلئے حوصلہ دیتا ہے،خواتین کو بااختیار بنانے کے حوالے سے نائب صدر قراة العین کی خدمات کو خراج تحسین پیش کرتے ہیں۔ انہوں نے کہا کہ پاکستان اپنی نصف آبادی کو پیچھے چھوڑ کر ترقی نہیں کر سکتا، ہماری معیشت کا مستقبل اور پائیدار ترقی خواتین کی متحرک شرکت پر منحصر ہے، آج خواتین کی زیر قیادت کاروبار صنعتوں کو تبدیل کر رہا ہے،چیلنجز کے باوجود پاکستان میں کاروباری خواتین رکاوٹوں کو توڑ کر روزگار پیدا اور برانڈز ڈویلپ کر رہی ہیں، ایف پی سی سی آئی سمیڈا کے اشتراک سے خواتین انٹرپنیوشپس کی کیپسٹی بلڈنگ اور ٹریننگ کیلئے پرعزم ہے۔ سی ای او سمیڈا مس نادیہ نے تقریب سے خطاب کرتے ہوئے کہا کہ حکومت سمال اینڈ میڈیم انٹرپرائزز کے ذریعے خواتین کو معاشی بااختیار بنانے کیلئے پرعزم ہے،خواتین کو قرضوں کی فراہمی اور اسکلز ڈویلپمنٹ کے ذریعے معاشی طور پر بااختیار بنایا جا سکتا ہے۔