بیجنگ(روشن پاکستان نیوز) چین نے فرانس سمیت کئی ممالک کے لیے ویزا فری انٹری پالیسی میں توسیع کا اعلان کیا ہے، جو اب 31 دسمبر 2026 تک نافذالعمل رہے گی۔
چینی وزارتِ خارجہ کے مطابق اس اسکیم میں سویڈن کو بھی شامل کیا جا رہا ہے، جس پر 10 نومبر سے عملدرآمد شروع ہوگا۔
وزارتِ خارجہ کی ترجمان ماؤ نِنگ نے پیر کے روز معمول کی پریس بریفنگ میں اس توسیع کی تصدیق کی۔ یہ پالیسی، جو پہلے 2024 کے آخر تک محدود تھی، اہل مسافروں کو کاروبار، سیاحت، خاندانی ملاقات یا ٹرانزٹ کے مقصد سے 30 دن تک چین کا سفر کرنے کی اجازت دیتی ہے، وہ بھی بغیر ویزا کے۔
چین کی ویزا فری پالیسی کا اطلاق یورپ، خلیجی ممالک، جنوبی امریکہ اور ایشیا پیسیفک کے درجنوں ممالک کے شہریوں پر ہوتا ہے۔ یہ اقدام بیجنگ کی اس حکمتِ عملی کا حصہ ہے جس کے تحت وہ وبا کے بعد متاثرہ سیاحت کے شعبے کو دوبارہ فعال کرنا چاہتا ہے۔
ویزا پابندیاں ختم کر کے چین کا مقصد زیادہ سے زیادہ غیر ملکی سیاحوں کو متوجہ کرنا اور وبا سے پہلے والے بین الاقوامی تعلقات کو بحال کرنا ہے۔
یہ توسیع ایسے وقت میں کی گئی ہے جب چین یورپی یونین (EU) کے ساتھ اپنے تعلقات کو مزید مضبوط بنانے کی کوشش کر رہا ہے، جو اس کے اہم تجارتی شراکت داروں میں سے ایک ہے۔
حال ہی میں برسلز میں ہونے والی اعلیٰ سطحی ملاقاتوں کے بعد چین نے نایاب معدنیات کی برآمدی پابندیوں میں نرمی کرتے ہوئے یورپی ممالک کو رعایت دی ہے۔ دونوں فریقین نے صنعتی اور سپلائی چین کے استحکام کے لیے رابطے برقرار رکھنے پر اتفاق کیا ہے۔
مزید پڑھیں: چینی کی قیمتوں میں ہوشربا اضافہ ، انتظامیہ مافیا کے سامنے بے بس
تجزیہ کاروں کے مطابق، چین کی یہ ویزا پالیسی نہ صرف سیاحتی سرگرمیوں کو فروغ دے گی بلکہ یورپی ممالک کے ساتھ عوامی روابط اور تجارتی تعلقات کو بھی مزید مضبوط بنائے گی۔
وہ ممالک جن کے شہری اب 31 دسمبر 2026 تک ویزا کے بغیر چین کا سفر کر سکیں گے: اینڈورا، ارجنٹائن، آسٹریلیا، آسٹریا، بحرین، بیلجیم، برازیل، بلغاریہ، چِلی، کروشیا، قبرص، ڈنمارک، ایسٹونیا، فن لینڈ، فرانس، جرمنی، یونان، ہنگری، آئس لینڈ، آئرلینڈ، اٹلی، جاپان، کویت، لٹویا، لیختنسٹائن، لکسمبرگ شامل ہیں۔
اس کے علاوہ مالٹا، موناکو، مونٹی نیگرو، نیدرلینڈز، نیوزی لینڈ، نارتھ مقدونیہ، ناروے، عمان، پیرو، پولینڈ، پرتگال، رومانیہ، سعودی عرب، سلوواکیہ، سلووینیا، جنوبی کوریا، اسپین، سوئٹزرلینڈ اور یوروگوائے بھی شامل ہیں جبب کہ پاکستان ان ممالک میں شامل نہیں ہے۔
ان ممالک کے شہری بغیر ویزا کے 30 دن تک چین میں کاروبار، سیاحت، خاندانی ملاقات یا ٹرانزٹ کے لیے قیام کر سکیں گے۔ چین کی جانب سے یہ تازہ اقدام نہ صرف سیاحت کو فروغ دینے میں مددگار ثابت ہوگا بلکہ عالمی سطح پر معاشی بحالی اور سفارتی تعلقات کو بھی نئی طاقت فراہم کرے گا۔
