راولپنڈی(کرائم رپورٹر) امریکن ایمبیسی کے لیگل اتاشی سم ٹنکن نے پولیس لائنز ہیڈکوارٹرز راولپنڈی میں سی پی او سید خالد ہمدانی سے خصوصی ملاقات کی۔ ملاقات کے دوران امریکی حکام نے راولپنڈی پولیس کی موثر پولیسنگ اور پیشہ ورانہ کارکردگی کو سراہا۔
لیگل اتاشی سم ٹنکن نے سی پی او سید خالد ہمدانی کو تعریفی سرٹیفیکیٹ پیش کیا اور کہا کہ وجیہہ سواتی کیس میں راولپنڈی پولیس نے بہترین تفتیش اور مقدمے کی پیروی کرتے ہوئے ملزمان کو قرار واقعی سزا دلوائی۔ قبل ازیں بھی ایف بی آئی کے لیگل اتاشی کرس واٹکنز کی جانب سے سی پی او راولپنڈی اور راولپنڈی پولیس کو بہترین تفتیش اور کڑی سزایابی پر تعریفی لیٹر اور سرٹیفیکیٹ دیا گیا تھا۔
سی پی او سید خالد ہمدانی نے اس موقع پر کہا کہ امریکی حکام کی جانب سے راولپنڈی پولیس اور پراسیکیوشن کی خدمات کا اعتراف قابل فخر ہے اور سنگین مقدمات میں ملزمان کی سزایابی باعث اطمینان ہے۔ انہوں نے وجیہہ سواتی قتل کیس کی سماعت کے دوران بہترین سیکورٹی فراہم کرنے پر اپنے عملے کو شاباش بھی دی۔
کچہری چوک میگا پراجیکٹ کا جائزہ:
سی پی او سید خالد ہمدانی نے کچہری چوک اور ملحقہ علاقوں کا دورہ کیا اور ٹریفک انتظامات اور صورتحال کا جائزہ لیا۔ انہوں نے چیف ٹریفک افسر کو ہدایت دی کہ سکول، کالج اور دفاتر کے اوقات میں شہریوں کی سہولت کے لیے بہترین ٹریفک منیجمنٹ کو یقینی بنایا جائے۔
مزید پڑھیں: راولپنڈی پولیس کی مختلف کارروائیاں: جرائم اور سمگلنگ کے خلاف سخت اقدامات
سی پی او نے کہا کہ میگا پراجیکٹ کی وجہ سے اہم شاہراہوں پر ٹریفک متاثر ہوئی ہے تاہم شہریوں کی سہولت کے لیے ہر ممکن اقدامات کیے جائیں گے۔ تمام ملحقہ سڑکوں پر ٹریفک کی روانی بہتر بنانے کے لیے اقدامات کیے جا رہے ہیں اور ہر پوائنٹ پر ٹریفک اسٹاف شہریوں کی سہولت اور آگاہی کے لیے موجود رہے گا۔ سی پی او نے واضح کیا کہ شہریوں کی سہولت اولین ترجیح ہے اور اسے یقینی بنانے کے لیے تمام وسائل بروئے کار لائے جائیں گے۔
یہ اقدامات شہریوں کے تحفظ، سہولت اور راولپنڈی میں موثر پولیسنگ کے عزم کو ظاہر کرتے ہیں۔
