راولپنڈی (محمد زاہد خان ) راولپنڈی ٹیسٹ کے تیسرے روز کے اختتام پر پاکستان نے دوسری اننگز میں 4 وکٹوں کے نقصان پر 94 رنز بنا کر مجموعی طور پر 23 رنز کی برتری حاصل کرلی تفصیلات کے مطابق راولپنڈی ٹیسٹ کے تیسرے روز کے اختتام پر پاکستان نے دوسری اننگز میں 4 وکٹوں کے نقصان پر 94 رنز بنا کر مجموعی طور پر 23 رنز کی برتری حاصل کرلی۔ اس سے قبل جنوبی افریقہ نے اپنی پہلی اننگز میں 404 رنز بنا کر 71 رنز کی سبقت حاصل کی تھی۔ تیسرے روز مہمان ٹیم نے 185 رنز چار کھلاڑی آؤٹ سے اننگز دوبارہ شروع کی، تاہم پاکستانی اسپنر آصف آفریدی نے شاندار بولنگ کا سلسلہ جاری رکھتے ہوئے ڈیوالڈ بریوس، کائل ویرائن اور ٹریسٹن اسٹبس کو آؤٹ کر کے اپنے پہلے ہی ٹیسٹ کی پہلی اننگز میں پانچ وکٹیں مکمل کیں۔ نعمان علی نے مارکو جینسن کو ایل بی ڈبلیو کیا جبکہ بعد میں سینورن میتھوسامی نے کیشو مہاراج کے ساتھ 71 اور ربادا کے ساتھ 98 رنز کی قیمتی شراکت قائم کی۔ ربادا 71 رنز بنا کر آصف آفریدی کا چھٹا شکار بنے جبکہ میتھوسامی 89 رنز پر ناٹ آؤٹ رہے۔ جنوبی افریقہ کے آخری تین وکٹوں پر 194 رنز کے اضافے نے پاکستان کو دباؤ میں رکھا۔ پاکستان کی جانب سے آصف آفریدی نے 6، نعمان علی نے 2 جبکہ شاہین آفریدی اور ساجد خان نے ایک ایک وکٹ حاصل کی۔ آصف آفریدی ڈیبیو پر پانچ وکٹیں لینے والے پاکستان کے دوسرے لیفٹ آرم اسپنر بن گئے ہیں۔ دوسری اننگز میں پاکستان کا آغاز مایوس کن رہا، امام الحق 9، عبداللہ شفیق 6 اور کپتان شان مسعود بغیر کوئی رن بنائے آؤٹ ہوئے، سعود شکیل نے 11 رنز بنائے جبکہ دن کے اختتام پر بابر اعظم 49 اور محمد رضوان 16 رنز کے ساتھ ناٹ آؤٹ ہیں۔
