اسلام آباد (عرفان حیدر) اینٹی نارکوٹکس فورس (اے این ایف) نے تعلیمی اداروں کے ارد گرد اور ملک کے مختلف شہروں میں منشیات کی اسمگلنگ کے خلاف وسیع کریک ڈاؤن آپریشن کیا جس کے نتیجے میں 6 کارروائیوں میں ایک افغان باشندے سمیت 9 ملزمان کو گرفتار کیا گیا۔

کارروائیوں کے دوران 24 لاکھ روپے سے زائد مالیت کی 22.436 کلوگرام منشیات برآمد ہوئیں۔ اے این ایف کے ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

مزید پڑھیں: راولپنڈی میں مختلف جرائم پر پولیس کی موثر کارروائیاں، قاتل اور اشتہاری گرفتار

تعلیمی اداروں کے قریب کارروائیاں

آپریشن کے دوران تعلیمی اداروں کو نشانہ بنانے والے اسمگلروں کے خلاف بھی decisive action لیا گیا۔

• اسلام آباد میں ایک یونیورسٹی کے قریب گاڑی سے 780 گرام چرس برآمد ہوئی جس کے بعد 2 ملزمان کو گرفتار کیا گیا۔

• حیدرآباد میں یونیورسٹی کے قریب ایک ملزم سے 3 کلوگرام چرس برآمد ہوئی۔ گرفتار ملزم نے تعلیمی اداروں کے طلبہ کو منشیات فروخت کرنے کا اعتراف کیا ہے۔

دیگر شہروں میں کارروائیاں

دیگر شہروں میں ہونے والی کارروائیوں میں منشیات کی بڑی مقداروں کے ساتھ ملزمان گرفتار ہوئے:

• موٹروے ٹول پلازہ، اسلام آباد کے قریب ایک مسافر وین میں سوار ملزم سے 6 کلوگرام چرس برآمد ہوئی۔

• کوٹ عبدالمالک ٹول پلازہ، شیخوپورہ کے قریب گاڑی سے 9.6 کلوگرام چرس اور 2 کلوگرام آئس (کرسٹل میتھ) برآمد ہوئی جبکہ 2 ملزمان گرفتار کیے گئے۔

• سنگر چورنگی، کراچی کے قریب ایک افغان باشندے سمیت 2 ملزمان سے 1.020 کلوگرام چرس برآمد ہوئی۔

• رنگ روڈ، پشاور پر ایک ملزم کے قبضے سے 36 گرام کوکین برآمد کی گئی۔

اے این ایف کے مطابق یہ کارروائیاں نوجوان نسل کو منشیات کے خوفناک کاروبار سے بچانے اور ملک بھر میں اسمگلنگ کے نیٹ ورکس کو تباہ کرنے کے عزم کا حصہ ہیں۔ فورس کا مؤقف ہے کہ وہ منشیات فروشوں کے خلاف کسی بھی قسم کے سمجھوتے کے بغیر کارروائی جاری رکھے گی۔