تہران(روشن پاکستان نیوز) ایران نے اسرائیل کے لیے جاسوسی کے الزام میں ایک شخص کو پھانسی دے دی۔
غیر ملکی میڈیا کے مطابق ایران میں بہمن چوبی (Bahman Choubi) نامی شخص کو اسرائیل کے لیے جاسوسی کے الزام میں پھانسی دے دی گئی ہے۔
اس حوالے سے ایرانی عدلیہ کے میڈیا ونگ میزان نے کہا کہ یہ مجرم ایران میں اسرائیل کے لیے جاسوسی کرنے والے اہم ترین جاسوسوں میں سے ایک تھا۔
میزان نے اپنے بیان میں کہا کہ جاسوسی کے ذریعے موساد کا بنیادی مقصد سرکاری اداروں کے ڈیٹا بیس کو حاصل کرنا اور ایرانی ڈیٹا سینٹرز میں خلل پیدا کرنا تھا، اس جاسوس نے الیکٹرانک آلات کی درآمد کے راستے سے متعلق معلومات بھی حاصل کیں۔
واضح رہے کہ جون 2025 میں شروع ہونے والی اسرائیل ایران جنگ کے دوران ایران میں اسرائیلی جاسوسوں کا بڑا نیٹ ورک سامنے آیا تھا، جنگ کے خاتمے کے بعد ایران نے اسرائیل کے لیے جاسوسی کے الزام میں کئی لوگوں کو پھانسی دی ہے۔
مزید پڑھیں: ایرانی صدر نے امریکا کے مطالبات کو ناقابل قبول قرار دے دیا
