لندن / اسلام آباد(روشن پاکستان نیوز) بین الاقوامی تنظیم، ڈائیسپورا اور تھنک ٹینک گلوبل پاک کشمیر سپریم کونسل کی قیادت نے کل جماعتی حریت کانفرنس اور جموں و کشمیر مسلم کانفرنس کے سابق چیئرمین اور سابق صدر پروفیسر عبدالغنی بھٹ کے انتقال پر گہرے دکھ اور افسوس کا اظہار کیا ہے۔
چیئرمین راجہ سکندر خان اور صدر کالا خان نے ایک مشترکہ بیان میں کہا کہ پروفیسر بھٹ ایک پرامن، عظیم، دورِ حاضر کے ممتاز دانشور، سیاستدان اور ماہرِ تعلیم تھے، جنہوں نے اپنی پوری زندگی کشمیری عوام کے حقوق، آزادی اور خودارادیت کے لیے وقف کی۔
راجہ سکندر خان نے مرحوم کو خراجِ عقیدت پیش کرتے ہوئے کہا کہ:
“پروفیسر عبدالغنی بھٹ نہ صرف ایک امن پسند رہنما تھے بلکہ ایک فکری رہبر بھی تھے جن کی سیاسی بصیرت اور علمی خدمات کو ہمیشہ یاد رکھا جائے گا۔ ان کی وفات بین الاقوامی سطح پر تسلیم شدہ متنازعہ ریاست جموں و کشمیر کے لیے جدوجہد کرنے والوں کے لیے ایک بڑا نقصان ہے۔”
صدر کالا خان نے مرحوم کے اہلِ خانہ اور کشمیری قوم سے دلی تعزیت کا اظہار کیا۔ انہوں نے مرحوم کے لیے ایصالِ ثواب اور جنت الفردوس میں اعلیٰ مقام کی دعا کرتے ہوئے کہا:
“پروفیسر عبدالغنی بھٹ کی دانش، شائستہ اندازِ گفتگو اور شفاف کردار کشمیر کی تاریخ میں ہمیشہ یاد رکھا جائے گا۔ وہ کشمیری تحریکِ آزادی کے ایک روشن ستارے تھے۔”
گلوبل پاک کشمیر سپریم کونسل نے اپنے بیان میں کہا کہ وہ مرحوم کی تحریکِ آزادی کشمیر کے لیے خدمات کو سلام پیش کرتے ہیں اور ان کے مشن کو جاری رکھنے کے عزم کا اعادہ کرتے ہیں۔
