اسلام آباد (سعد عباسی)  تھانہ آبپارہ کی حدود میں واقع سیکٹر جی سکس میں نامعلوم افراد کی فائرنگ سے پولیس کانسٹیبل علی حیدر شدید زخمی ہو گیا۔ علی حیدر، جن کا بیلٹ نمبر 2624 ہے، اپنے گھر میں موجود تھا جب رات تقریباً 11:30 بجے اچانک چند مسلح افراد اس کے گھر میں داخل ہوئے اور اسے دیکھتے ہی اندھا دھند فائرنگ شروع کر دی۔

واقعے کے فوراً بعد مضروب کو تشویشناک حالت میں پولی کلینک اسپتال منتقل کیا گیا جہاں اسے طبی امداد دی جا رہی ہے۔ پولیس حکام کے مطابق واقعے کی تفتیش جاری ہے اور ملزمان کی تلاش کے لیے مختلف ٹیمیں تشکیل دے دی گئی ہیں۔

پولیس کا کہنا ہے کہ ابتدائی تحقیقات میں ذاتی دشمنی سمیت تمام پہلوؤں کا جائزہ لیا جا رہا ہے۔ واقعے نے علاقے میں خوف و ہراس کی فضا پیدا کر دی ہے، جبکہ سیکیورٹی مزید سخت کر دی گئی ہے۔

مزید پڑھیں: اسلام آباد: تھانہ شمس کالونی پولیس کی بڑی کارروائی، قتل کا اشتہاری مجرم گرفتار