راولپنڈی(روشن پاکستان نیوز) ابھی بلوچستان کے ڈیگارے دوہرے قتل کی دھول چھٹی نہیں تھی کہ راولپنڈی کے علاقے پیرودھائی میں بھی ایک افسوسناک واقعہ سامنے آگیا، جہاں پسند کی شادی کرنے والی نوجوان لڑکی سدرہ کو مبینہ طور پر جرگے کے فیصلے پر گلا گھونٹ کر قتل کر دیا گیا۔ پولیس کے مطابق واردات 17 جولائی کو ہوئی۔
میڈیا رپورٹ کے مطابق سدرہ کو اس کی پسند کی شادی پر شدید دباؤ کا سامنا تھا۔ وہ کشمیر فرار ہو گئی تھی لیکن بعد میں اسے واپس لاکر قتل کیا گیا۔ مقتولہ کو خاموشی سے رات کے اندھیرے میں دفنا دیا گیا اور اس کی قبر کا نشان بھی مٹا دیا گیا تاکہ شواہد چھپائے جا سکیں۔
پولیس ذرائع کے مطابق واقعے میں قبرستان کمیٹی کے سابق چیئرمین اور گورکن کو گرفتار کر لیا گیا ہے۔
پولیس کے مطابق سدرہ کے شوہر ضیاءالرحمان کی مدعیت میں ایک مقدمہ درج کیا گیا۔ جس میں مقتولہ سدرہ پر زیورات اور نقدی لے کر فرار ہونے کا الزام لگایا گیا ہے۔ ایف آئی آر میں لڑکی پر عثمان نامی لڑکے کے ساتھ بھاگ جانے کا الزام بھی لگایا گیا۔
اب پولیس نے عدالت سے مقتولہ کی قبر کشائی کی اجازت طلب کی ہے تاکہ قتل کی تصدیق اور شواہد حاصل کیے جا سکیں۔
پولیس کی جانب سے دائر کی گئی قبر کشائی کی درخواست پر عدالت نے مقتولہ کے ورثاء کو 26 جولائی کے لیے نوٹس جاری کرتے ہوئے شفاف تحقیقات کا آغاز کر دیا ہے۔
مزید پڑھیں: اے این ایف کا ملک گیر کریک ڈاؤن، تعلیمی اداروں کے اطراف اور مختلف شہروں سے منشیات فروش گرفتار
مجسٹریٹ قیصر عباس تارڑ نے پولیس کی درخواست پر فوری ایکشن لیتے ہوئے مقتولہ کی قبر کی نشاندہی کی ہدایت جاری کر دی ہے اور متعلقہ ایس ایچ او اور ٹی ایم اے کو حکم دیا ہے کہ سدرہ کی قبر پر سیکیورٹی کے لیے گارڈ تعینات کیا جائے تاکہ شواہد کے ساتھ کسی قسم کی چھیڑ چھاڑ نہ ہو۔
پولیس نے عدالت کو بتایا کہ واقعے کی مکمل تحقیقات کے لیے مقتولہ کی قبر کشائی اور پوسٹ مارٹم ضروری ہے تاکہ موت کی اصل وجوہات سامنے آ سکیں۔
