اسلام آباد (روشن پاکستان نیوز) پاکستان میں جلد ایک نئی ڈیجیٹل مالیاتی سروس متعارف ہونے جا رہی ہے، جس کا نام “Jingle Pay” رکھا گیا ہے۔ باخبر ذرائع کے مطابق یہ کمپنی اگست یا ستمبر 2025 میں اپنی خدمات کا باقاعدہ آغاز کرے گی، تاہم فی الحال باضابطہ اعلان رازداری کے پیش نظر نہیں کیا جا رہا۔
“Jingle Pay” ایک موبائل والٹ کمپنی ہو گی، جو پاکستان میں جدید مالیاتی سہولیات فراہم کرنے کے عزم کے ساتھ مارکیٹ میں داخل ہو رہی ہے۔ اس نئے موبائل والٹ منصوبے میں پاکستان کے معروف بینک ‘بینک الفلاح’ کا تعاون شامل ہے، جبکہ اس کے دیگر بین الاقوامی شراکت داروں میں متحدہ عرب امارات کی کمپنیوں کا کردار نمایاں ہے۔
ذرائع کے مطابق Jingle Pay صارفین کو بینکنگ کے متبادل طور پر ایک محفوظ، آسان اور فوری ڈیجیٹل فنانس پلیٹ فارم مہیا کرے گا، جس کے ذریعے لوگ موبائل فون سے رقم کی منتقلی، بلوں کی ادائیگی، آن لائن خریداری اور دیگر مالی خدمات حاصل کر سکیں گے۔
ٹیکنالوجی اور فِن ٹیک ماہرین کے مطابق Jingle Pay کے پاکستان میں داخلے سے مقامی ڈیجیٹل فنانس سیکٹر میں مقابلہ بڑھے گا اور صارفین کو جدید اور متنوع آپشنز میسر آئیں گے۔ کمپنی کے ابتدائی وژن کے مطابق، کم بینکنگ سہولیات رکھنے والے علاقوں میں بھی مالی شمولیت کو فروغ دینا ان کی اولین ترجیح ہو گی۔
مزید پڑھیں: پاکستان اسٹاک ایکسچینج میں کاروبار کا مثبت رجحان، ڈالر سستا ہوگیا
اب تک کمپنی کی جانب سے باضابطہ پریس ریلیز یا تشہیری مہم کا آغاز نہیں کیا گیا، تاہم یہ توقع کی جا رہی ہے کہ اگلے دو ماہ کے اندر اس کا رسمی افتتاح کر دیا جائے گا۔
Jingle Pay کا صدر دفتر متحدہ عرب امارات میں ہے، اور اس کی پاکستان میں آمد کو ایک اہم مالیاتی پیش رفت قرار دیا جا رہا ہے، جس سے ملکی فِن ٹیک انڈسٹری کو نئی جہت ملے گی۔
