اسلام آباد(روشن پاکستان نیوز) پاکستان کی پہلی قومی سطح پر ہونے والی کرکٹ لیگ، کیپیٹل پریمیئر لیگ (سی پی ایل)، نے اپنی پہلی فرنچائز اوورسیز ایمبیسڈر حاصل کر لیا ہے۔ آسٹریلیا کی “پیسرز اکیڈمی” نے سی پی ایل کی فرنچائز خریدی ہے۔ اسلام آباد میں اس معاہدے کے دستخط کی تقریب ہوئی، جس میں سی پی ایل کے چیف ایگزیکٹو نیئر صدیقی اور آسٹریلین پیسرز اکیڈمی کے چیف ایگزیکٹو سہیل شاہ نے دستخط کیے۔
تقریب سے خطاب کرتے ہوئے سی پی ایل کے صدر ارشد علی بیگا نے کہا کہ اس لیگ میں نوجوان کرکٹرز کو اپنا ٹیلنٹ دکھانے کا بھرپور موقع ملے گا۔ انہوں نے مزید کہا کہ ہم سی پی ایل کو پاکستان کی بہترین کرکٹ لیگ بنانے کی کوشش کریں گے اور پاکستان کرکٹ بورڈ کے ساتھ تمام معاملات طے ہوچکے ہیں۔ جلد ہی لیگ کے شیڈول کا اعلان کر دیا جائے گا۔
سی پی ایل کے برینڈ ایمبیسڈر شعیب اختر ہیں، جو کرکٹ کی دنیا میں ایک معروف نام ہیں۔ فرنچائز اوورسیز ایمبیسڈر کے چیف ایگزیکٹو سہیل شاہ نے کہا کہ پاکستان میں ایسی لیگ کا حصہ بن کر خوشی ہو رہی ہے، اور ہم دنیا بھر سے بہترین کرکٹرز کو پاکستان لائیں گے۔ انہوں نے کہا کہ ہمارا مقصد پاکستان سے نئے کرکٹ ٹیلنٹ کو عالمی سطح پر متعارف کرانا ہے۔
یہ معاہدہ پاکستان کی کرکٹ کی دنیا میں ایک اہم سنگ میل ہے اور اس سے نہ صرف پاکستانی کرکٹ کے فروغ میں مدد ملے گی بلکہ عالمی سطح پر بھی پاکستان کی کرکٹ لیگ کا مقام مستحکم ہوگا۔
