اسلام آباد (روشن پاکستان نیوز) پاکستان پیپلز پارٹی کے چیئرمین بلاول بھٹو زرداری نے کہا ہے کہ “گرین انیشیٹو” ایک ایسا منصوبہ ہے جو تمام صوبوں اور ملک کے مفاد میں ہے، اور اس میں کسی قسم کی سیاست نہیں ہونی چاہیے۔ انہوں نے اس بات پر زور دیا کہ کینالوں کے حوالے سے صدر پاکستان آصف علی زرداری کی دی گئی تجویز کو حکومت کو تسلیم کرنا ہوگا۔
بلاول بھٹو زرداری نے کہا، “اگر حکومت اس تجویز کو نہیں مانے گی تو اس سے وفاقی سطح پر نقصان ہوگا۔ ہمارے لئے گرین سندھ، گرین پنجاب اور گرین پاکستان کے منصوبے اہم ہیں۔” ان کا مزید کہنا تھا کہ “کیا حکومت چاہے گی کہ یہ اہم منصوبے تنازعہ کا شکار ہوں؟”
بلاول نے کہا کہ انہیں یقین ہے کہ حکومت ان منصوبوں کو کامیاب بنانا چاہے گی تاکہ وفاقی نظام بھی مضبوط ہو سکے۔ انہوں نے کہا کہ “اگر ملک کے کسی بھی علاقے سے لوگ احتجاج کر رہے ہیں تو وفاقی حکومت کا فرض بنتا ہے کہ وہ عوام کے مسائل حل کرے۔”
مزید پڑھیں: ترکمانستان میں تعینات پاکستانی سفیر احسن وگن کو امریکا میں داخلے سے روک دیا گیا
بلاول بھٹو زرداری کا یہ بیان اس بات کی غمازی کرتا ہے کہ پیپلز پارٹی وفاقی حکومت پر دباؤ ڈال رہی ہے کہ وہ اس اہم اور عوامی مفاد کے منصوبے پر عمل درآمد میں رکاوٹ نہ ڈالے۔ ان کے مطابق، “گرین انیشیٹو” ملک بھر کے لوگوں کی فلاح و بہبود کے لئے ایک مثبت قدم ثابت ہوگا۔
