کلرسیداں(کرائم رپورٹر) کلرسیداں کے علاقہ دھری راجگان میں ایک پراسرار واقعہ پیش آیا ہے، جہاں گندم کے کھیت سے ایک نعش برآمد ہوئی ہے۔ ذرائع کے مطابق، نعش گندم کے کھیت میں پڑی ہوئی ملی ہے، جس کے بعد علاقے میں ہلچل مچ گئی۔
واقعہ کی اطلاع ملتے ہی تھانہ کلرسیداں کی پولیس موقع پر پہنچ گئی اور نعش کو اپنی تحویل میں لے لیا۔ ابتدائی تحقیقات کے مطابق، نعش کی شناخت عبدالرحمن ولد عبدالطیف کے نام سے ہوئی ہے، جو روات کے علاقے قاسم آباد کا رہائشی بتایا جا رہا ہے۔
پولیس نے مقتول کے اہل خانہ سے رابطہ کر کے مزید تفصیلات حاصل کرنے کی کوشش کی ہے۔ عبدالرحمن کی موت کی وجہ اور اس کے کھیت میں پڑے ہونے کے حالات ابھی تک واضح نہیں ہیں۔ پولیس نے واقعہ کی تفتیش کا آغاز کر دیا ہے اور ابتدائی طور پر قتل کا شبہ ظاہر کیا گیا ہے۔
علاقے کے رہائشیوں نے اس واقعے پر گہرے صدمے کا اظہار کیا ہے اور پولیس سے مطالبہ کیا ہے کہ وہ واقعہ کی تہہ تک پہنچ کر مجرم یا مجرمان کو کیفرِ کردار تک پہنچائے۔
پولیس نے علاقے میں چھان بین اور تحقیقات کا دائرہ وسیع کر دیا ہے۔
مزید پڑھیں: حافظ آباد: ڈکیت سلیمان پولیس مقابلے میں ہلاک
