لاہور(روشن پاکستان نیوز) پنجاب اسمبلی میں جنوبی ایشیا کے 22 ممالک کے نمائندوں، پارلیمنٹ کے ارکان اور خصوصی مہمانوں کی موجودگی میں ایک اہم کانفرنس کا آغاز ہوا۔ یہ کانفرنس پاکستان کی میزبانی میں ہو رہی ہے اور اس کا مقصد خطے کے مشترکہ مسائل پر تبادلہ خیال اور ان کے حل کے لئے باہمی تعاون کو فروغ دینا ہے۔
اس کانفرنس میں پاکستان کے اہم قانونی شخصیات بھی شریک ہوئیں جن میں راجہ ضمیر الدین احمد (اسسٹنٹ اٹارنی جنرل پاکستان)، چوہدری امتیاز الٰہی (ڈپٹی اٹارنی جنرل پاکستان)، راجہ خرم (ڈپٹی اٹارنی جنرل پاکستان)، اور رانا عرفان (اسسٹنٹ اٹارنی جنرل پاکستان) شامل تھے۔ ان سب کو خصوصی دعوت نامے جاری کیے گئے تھے اور انہوں نے کانفرنس میں بھرپور شرکت کی۔
پنجاب اسمبلی کی جانب سے میزبانی کی جانے والی اس کانفرنس کی یہ پہلی مثال ہے جس میں جنوبی ایشیا کے مختلف ممالک کے نمائندگان ایک جگہ جمع ہو کر علاقائی مسائل پر گفتگو کر رہے ہیں۔
سپیکر نیشنل اسمبلی جناب ایاز صادق اور سپیکر پنجاب اسمبلی جناب ملک احمد خان نے کانفرنس کے شرکاء کا خیرمقدم کرتے ہوئے ان کا شکریہ ادا کیا اور اس بات کا عزم ظاہر کیا کہ یہ کانفرنس خطے کے مسائل کو حل کرنے کے لیے اہم قدم ثابت ہو گی۔ دونوں رہنماؤں نے کہا کہ اس کانفرنس میں کی جانے والی بحثیں اور تجزیے مشترکہ مسائل کے حل میں معاون ثابت ہوں گے۔
یہ کانفرنس 10 فروری تک جاری رہے گی اور اس دوران مختلف مسائل جیسے اقتصادی ترقی، سیکورٹی، ماحولیاتی تبدیلیوں اور دیگر مشترکہ چیلنجز پر تفصیل سے بات چیت کی جائے گی۔
مزید پڑھیں: چکوال: راجہ ضمیر الدین احمد کی عوامی خدمات، اہم شخصیات سے ملاقاتیں اور تعزیت کے دوران مثبت پیغامات کا تبادلہ
آج کے سیشن کے اختتام پر راجہ ضمیر الدین احمد نے ایم پی اے ملک شہریار، ایم پی اے ملک فلک شیر، ایم پی اے طارق سبحانی، میڈیم عزمہ بخاری (وزیر اطلاعات)، سکریٹری اسمبلی عامر حبیب چوھدری، اور ملک احمد خان (سپیکر اسمبلی) سے ملاقات کی اور اس اہم موقع پر ان سے خیالات کا تبادلہ کیا۔
پاکستان کی میزبانی میں ہونے والی یہ کانفرنس نہ صرف جنوبی ایشیا کی پارلیمانی قوتوں کو یکجا کر رہی ہے بلکہ خطے کے مسائل کے حل کے لئے ایک نیا راستہ بھی فراہم کر رہی ہے۔
