راولپنڈی(کرائم رپورٹر) سٹی پولیس آفیسر سید خالد ہمدانی کی ہدایت پر راولپنڈی پولیس نے شہر بھر میں فلیگ مارچ کیا جس کی قیادت ایس پی سیکورٹی ناصر علی خان نے کی۔ فلیگ مارچ کا مقصد امن و امان کا قیام اور قانون کی بالادستی کو یقینی بنانا تھا۔ اس دوران 6000 سے زائد پولیس افسران اور اہلکار تعینات کیے گئے۔ سی پی او سید خالد ہمدانی کا کہنا تھا کہ دفعہ 144 نافذ العمل ہے، کسی بھی غیر قانونی اجتماع یا ریلی کی اجازت نہیں دی جائے گی، اور امن و امان میں خلل ڈالنے والوں کے ساتھ سختی سے نمٹا جائے گا۔
اسی دوران، گوجرخان پولیس نے ایک شادی کی تقریب میں ہوائی فائرنگ کرنے والے تین ملزمان کو گرفتار کرلیا۔ گرفتار ملزمان میں انتخاب، بابر اور ثاقب شامل ہیں، جن سے تین کلاشنکوف اور ایمونیشن برآمد ہوا۔ ایس پی صدر محمد نبیل کھوکھر کا کہنا تھا کہ ملزمان کو عدالت میں پیش کیا جائے گا اور وہ کسی صورت قانون کی گرفت سے بچ نہیں سکیں گے۔
تھانہ بنی پولیس نے ایک بڑی کامیابی حاصل کرتے ہوئے ڈکیتی کی وارداتوں میں ملوث اشتہاری مجرم محسن خان کو گرفتار کرلیا۔ محسن خان نے اپنے ساتھیوں کے ساتھ گزشتہ سال ایک شہری کے گھر ڈکیتی کی واردات کی تھی۔ اس کے چار ساتھی پہلے ہی گرفتار ہوچکے ہیں۔ ایس پی راول محمد حسیب راجہ کا کہنا تھا کہ اشتہاری مجرم کو ٹھوس شواہد کے ساتھ عدالت میں پیش کیا جائے گا۔
آر اے بازار پولیس نے سٹریٹ کرائم میں ملوث تین رکنی گینگ کو گرفتار کیا جن سے 27 ہزار روپے کی مسروقہ رقم اور وارداتوں میں استعمال ہونے والا اسلحہ برآمد ہوا۔ ایس پی پوٹھوہار ناصر نواز نے کہا کہ شہریوں کی جان و مال پر حملہ کرنے والے ملزمان کو قانون کی گرفت سے بچنے نہیں دیا جائے گا۔
راولپنڈی پولیس نے منشیات فروشوں اور شراب سپلائرز کے خلاف بھی بھرپور کارروائیاں جاری رکھی ہیں۔ مختلف علاقوں سے چار ملزمان گرفتار کیے گئے اور ان کے قبضے سے تین کلو سے زائد چرس اور 10 لیٹر شراب برآمد ہوئی۔ پولیس حکام نے کہا کہ منشیات فروشوں اور شراب سپلائرز کے خلاف کارروائیاں جاری رہیں گی۔
مزید پڑھیں: پنجاب میں اس وقت کوئی ریلی نہیں نکلی ،ڈی چوک آنے والوں کو گرفتار کرینگے،وفاقی وزیر داخلہ
ترجمان راولپنڈی پولیس کے مطابق، شہریوں کے جان و مال کی حفاظت کو اولین ترجیح دی جارہی ہے اور شہر میں امن و امان کی صورتحال کو بہتر بنانے کے لیے تمام ضروری اقدامات کیے جا رہے ہیں۔
