حافظ آباد(شوکت علی وٹو) پاکستان مسلم لیگ (ن) کی رہنما اور سابق وفاقی وزیر سائرہ افضل تارڑ نے حافظ آباد ڈسٹرکٹ پریس کلب میں ایک اہم پریس کانفرنس سے خطاب کرتے ہوئے چوہدری مہدی حسن بھٹی اور ان کے برجدارہ گروپ کے بیانات کی سخت الفاظ میں مذمت کی۔ انہوں نے کہا کہ “ہمارے خلاف بے بنیاد الزامات لگائے جا رہے ہیں، لیکن حقیقت یہ ہے کہ ہم نے ہمیشہ عوام کی فلاح و بہبود کے لیے کام کیا ہے۔”
پریس کانفرنس میں سائرہ افضل تارڑ نے حافظ آباد میں جاری ترقیاتی منصوبوں پر تفصیل سے روشنی ڈالی۔ انہوں نے کہا کہ “یونیورسٹی آف حافظ آباد کا منصوبہ جلد ہی پایہ تکمیل تک پہنچے گا اور وہاں کلاسز کا آغاز جلد متوقع ہے۔” انہوں نے مزید بتایا کہ “ڈسٹرکٹ ہیڈ کوارٹر ہسپتال میں انسولین کی فراہمی کو مزید آسان بنایا گیا ہے، اور مریض اب ایک ہی جگہ پر انسولین حاصل کر سکتے ہیں۔”
انہوں نے صحت کے دیگر شعبوں میں بھی اصلاحات کی بات کی اور کہا کہ “ہیلتھ کارڈ کے ذریعے علاج کی سہولت فراہم کی جا چکی ہے اور ہم نے میڈیسن کے مسائل کو حل کر دیا ہے۔” سائرہ تارڑ نے مزید کہا کہ “سڑکوں کی تعمیر کا کام شروع ہو چکا ہے، خاص طور پر پنڈی بھٹیاں کی سڑک کی تعمیر کا آغاز ہو چکا ہے۔”
سائرہ تارڑ نے کرپشن کے خاتمے پر بھی زور دیتے ہوئے کہا کہ “ہم نے میونسپل کمیٹی حافظ آباد کو کرپشن فری کر دیا ہے اور اب اسے ورلڈ بینک کے پروجیکٹس میں شامل کیا گیا ہے۔” انہوں نے اندرون شہر صفائی کے نظام میں بہتری کی طرف اشارہ کرتے ہوئے کہا کہ “آئندہ دنوں میں کوڑا کرکٹ آپ کے گھروں سے اٹھایا جائے گا۔”
پریس کانفرنس کے دوران سائرہ تارڑ نے اپنے سیاسی حریفوں پر بھی کڑی تنقید کی۔ انہوں نے کہا کہ “پی ٹی آئی والوں اور ہمارے مخالفین کی طرف سے واویلا کیا جا رہا ہے، لیکن حقیقت یہ ہے کہ ان کے اپنے گھر کے بلز ادا نہیں ہوئے۔” سائرہ نے بتایا کہ “چوہدری مہدی حسن بھٹی کے خاندان کے سوئی گیس بلز 6 لاکھ روپے سے زائد ہیں جو ابھی تک ادا نہیں کیے گئے ہیں۔” انہوں نے مزید کہا کہ “یہ لوگ ہمیں چور قرار دیتے ہیں، لیکن ان کے اپنے میٹر ٹیمپرنگ کی وجہ سے بلز واجب الادا ہیں۔”
مزید پڑھیں: حیدرآباد میں پولیس کے جونیئر کلرک کی کرپشن کی کہانی: اہلکاروں سے ماہانہ لاکھوں روپے وصول کرنے کا انکشاف
انہوں نے پی ٹی آئی کے مقامی رہنماؤں پر بھی الزام عائد کیا کہ انہوں نے اپنے کاروباروں اور گھروں کے واجب الادا بلز ادا نہیں کیے اور مختلف ٹرانسفارمرز کے حوالے سے ایف آئی آر درج ہونے کا ذکر بھی کیا۔ سائرہ نے کہا کہ “ہمیں کرپشن کا الزام نہیں دیا جا سکتا، کیونکہ ہم نے ہمیشہ بلز ادا کیے ہیں اور عوامی مفاد کے لیے کام کیا ہے۔”
سائرہ تارڑ نے آخر میں کہا کہ “ہم نے ہمیشہ اپنے وعدوں کو سچ ثابت کیا ہے اور آئندہ بھی عوام کی خدمت جاری رکھیں گے۔”
