اسلام آباد(روشن پاکستان نیوز)ایئرپورٹس سیکیورٹی فورس کے عملے نے کراچی ایئرپورٹ پر کارروائی کرتے ہوئے دبئی جانے والی پرواز کے مسافر کے قبضے سے تقریباً ڈھائی کلو گرام آئس ہیروئن برآمد کرلی۔
حکام کے مطابق دبئی جانے کے لیے کراچی ایئرپورٹ پر آنے والے مسافر محمد احسن کے سامان میں شامل آٹا گوندھنے والی مشین کو اے ایس ایف کے عملے نے مشکوک قرار دے دیا۔
اے ایس ایف اہلکاروں نے مشین کی مکمل تلاشی کے بعد مشین میں خفیہ طور پر چھپائی گئی 2.28 کلو گرام آئس ہیروئن اور 420 گرام براؤن ہیروئن برآمد کر کے منشیات کو کراچی سے دبئی سمگل کرنے کی کوشش ناکام بنا دی۔
اے ایس ایف کے ترجمان کے مطابق ملزم کو ابتدائی تفتیش کے بعد ہیروئن سمیت اے این ایف حکام کے حوالے کر دیا گیا ہے۔
