اسلام آباد(روشن پاکستان نیوز)اب دیکھتے ہیں پنجاب کی سیاست میں مزید کیا تبدیلیاں رونما ہونگی،فیصلے سے کون راضی اورکون ناراض یہ بعد کی باتیں ہیں فی الحال سابق وزیراعلیٰ پنجاب چوہدری پرویز الٰہی کو تحریک انصاف کا صدربنادیا گیا۔سابق وزیراعظم اور چیئرمین پی ٹی آئی عمران خان کے دستخطوں سے پرویز الٰہی کی تقرری کا نوٹیفکیشن بھی جاری ہوگیا۔
سابق وفاقی وزیر فواد چوہدری نے عمران خان کی جانب سے نوٹیفکیشن کی کاپی پرویزالٰہی کو پیش کی۔ چوہدری پرویزالٰہی نے عمران خان کا شکریہ اداکرتے ہوئے کہا کہ عمران خان نے جو اعتماد کیا اس کیلئے شکرگزار ہوں، عمران خان کے ساتھ ڈٹ کر آئین اور قانون کی سربلندی کی جدوجہد کریں گے۔
پرویز الئیٰ کا کہنا تھا کہ عمران خان ملک میں آئین اورقانون اورعام آدمی کی جنگ لڑ رہے ہیں، عمران خان کا راستہ روکنا حکومت کے بس کی بات نہیں وہ عوام کے دلوں میں بس چکے ہیں، ملک میں ہونے والا ہر سروے اور ہر ضمنی الیکشن عمران خان کی مقبولیت کی گواہی دے رہاہے۔
یہ بھی یاد رہے کہ سابق وزیراعلیٰ گزشتہ دنوں مسلم لیگ (ق) کو چھوڑ کر تحریک انصاف میں شامل ہوئے تھے۔
