کوہاٹ(روشن پاکستان نیوز) کوہاٹ یونیورسٹی آف سائنس اینڈ ٹیکنالوجی کے 13ویں کانووکیشن کی تقریب،میری ڈگری کے اصل حقدارمیرے والد ہیں،گورنرکے پی کے نے طالبہ کی خواہش پوری کردی۔اسٹیج سے نیچے اتر کر طالبہ کے بزرگ والد کوڈگری دی۔
گورنرخیبرپختونخوا حاجی غلام علی نے کوہاٹ یونیورسٹی آف سائنس اینڈ ٹیکنالوجی کے 13ویں کانووکیشن میں بحثیت مہمان خصوصی شرکت کی۔
گورنرخیبرپختونخوا کے دفتر پریس سیکرٹری کے مطابق گورنر نےکانووکیشن میں نمایاں تعلیمی پوزیشن حاصل کرنیوالے 75 طلباء وطالبات کو گولڈ میڈلز پہنائے، 248 طلباءوطالبات میں ماسٹر اور بیچلر، ایم فل، پی ایچ ڈی ڈگریاں تقسیم کیں۔
گورنر نے کانووکیشن میں گولڈ میڈل حاصل کرنیوالی طالبہ کی خواہش پر اسکے ضعیف والد کو اسٹیج سے نیچے اتر کر انکی بیٹی کی ڈگری حوالے کی۔
کانووکیشن میں وائس چانسلر کوہاٹ یونیورسٹی پروفیسر ڈاکٹر سردار خان نے یونیورسٹی کی مجموعی کارکردگی رپورٹ بھی گورنر کو پیش کی۔
گورنر نے مختلف شعبوں میں تعلیم مکمل کرنیوالے طلباء و طالبات، والدین اور یونیورسٹی فیکلٹی و انتظامیہ کو مبارکباد دی۔
کانووکیشن میں نگران صوبائی وزیر حامد شاہ، نگران وزیر اعلٰی کے مشیر رحمت سلام خٹک، ڈپٹی کمشنر کوہاٹ، ڈی آئی جی کوہاٹ، کوہاٹ چیمبر کے صدر عبدالرشید خان، طلباء و طالبات اور والدین بڑی تعداد میں شریک تھے۔
