بیجنگ(ویب ڈیسک)امریکی حرکتوں کو نظراندازنہیں کیا جاسکتا،واشنگٹن اوربیجنگ کے مابین بڑھتی کشیدگی کا ذمہ دارامریکہ خود ہے، چینی وزیر خارجہ چن کینگ کا دوٹوک موقف سامنے آگیا۔۔
ایک پریس کانفرس کے دوران چینی وزیر خارجہ نے کھل کرکہا کہ امریکہ ایک صحت مندانہ مقابلے کے بجائے چین کے خلاف کینے اور بغض سے بھری مہم چلارہا ہے۔
چینی وزیرخارجہ کا کہنا تھا کہ اگر امریکہ نے اپنی روش کو تبدیل نہ کیا تو اس مہم کا اختتام تصادم پر ہوسکتا ہے۔
چن کینگ کا کہنا تھا کہ امریکا کی جانب سے تنازعہ کو بڑھاوا دینے کی مذموم کوششوں کو نظر انداز نہیں کیا جاسکتا ہے۔
چینی وزیر خارجہ نے الزام عائد کیا کہ چین کے متعلق امریکا کے خیالات مسخ شدہ ہیں اور وہ چین کو ایک بڑا حریف اور چیلنج سمجھ رہے ہیں۔
انہوں نے کہا کہ امریکا ہمیشہ قانون کی حکمرانی کی بات کرتا ہے لیکن خود قانون پر عمل نہیں کرتا، اس کو درست عمل نہیں کہا جاسکتا۔
